மண்டேலாவின் புரட்சிப் பயணம்

-->

தொடரட்டும் மடிபாவின் பயணம்!

ஆலிவர் ஷெர்மான்

(ஜமைக்கா கவிஞர்)

இறைவா,

இந்த சேதியைக் கொண்டுபோ

பக்குவமாய் சேர்த்துவிடு

பழுத்த அந்த சிங்கத்திடம்!

ஓ, அதன் கண்களில்

இன்னும் எத்தனை பிரகாசம்,

எத்துணை ஜீவன்!

வியந்துபோகிறேன் அதுகண்டு;

வீணே கழித்துவிட்டேனோ என் காலம்?

என் வயதில் அவரோ

எழுதி முடித்துவிட்டார்

தன் தேசத்து

மகத்தான எதிர்காலத்தின்

மறுபக்கம்!

காரக்கிருகத்தில்

கட்டுண்டு கிடந்தார் பல்லாண்டு

காட்டு விலங்கும்

கலங்கித்தான் போயிருக்கும்

கடுஞ்சினத்தில்;

ஆனால்,

மருளவில்லை மண்டேலா...

வாராது வந்த மாமணி...

மடிபா எனும் வீரச்சிங்கம்!

புகழ்மிகு தந்தையே,

துவண்டு கிடக்கும் பிடரி சிலிர்த்து

துள்ளி எழுவீர் மீண்டும்!

தொடருட்டும் உம் பயணம்

சவன்னா கானகத்தில்!!

காற்றில் மிதந்துவரும்-உங்கள்

கர்ஜனையின் அலைகள்

கலக்கட்டும் பூமித்தாயின் உள்ளத்தை

கதறித் தன்னுள் அவள் அழைக்கும்போதும்

தளர்த்தவேண்டாம் பீடுநடைதனை!

நீரல்லவோ எமைத் தலைநிமிரச் செய்தீர்

மெய்யாகவே நானும்கூட-அந்தப்

பெருமையின் ஒரு துளிதான்!

கறுப்பு-வெளுப்பு பேதம்

கடுகளவும் பாராத மனிதக்கூட்டம்

நாங்கள் காண்பதெல்லாம்

சிவப்பும், பொன்னிறமும்,

பச்சை வண்ணமும்தான்!

எங்கள் இதயமெல்லாம்-அந்த

அரிமாவிடம் அடைக்கலம்

அதனால்தான் வேண்டுகிறேன்:

இறைவா,

இந்த சேதியை தயைகூர்ந்து

ஏந்திச் செல்க!

இயலாதென்றால்

ஒன்பது பிறவிகொண்டு சோம்பித்திரியும்

அந்த பொய்ப்பூனைகளின்

ஆயுளைப் பறித்துவிடு;

ஏற்கட்டும் அதனை

எம் கருணைச் சிங்கம்!

எங்கள் மடிபா, வீரத்திருமகனே,

காவியத்துக் கதைபோல்

வழிமீது வழிவைத்து

காத்திருப்போம் உமக்காக!

உங்கள் பயணம்

இன்னும் முடியவில்லையன்றோ?

தமிழில்: விதுரன்